ខេត្តកណ្ដាល ៖ ជនសង្ស័យ២នាក់ជិះម៉ូតូធ្វើសកម្មភាពធាក់ប្លន់យកម៉ូតូពីនារី២នាក់ដែលកំពុងជិះតាមដងផ្លូវ តែពុំបានសម្រេចឡើយ ត្រូវសមត្ថកិច្ចក្រុងតាខ្មៅក្របួចជាប់ទាំងពីរនាក់កាលពីរសៀលថ្ងៃទី២៦ ខែមេសា ឆ្នាំ២០២២នេះ នៅមុខច្រកចូលរោងចក្រដើមត្នោត (ខាងលិចរង្វង់មូលព្រែកសំរោង) លើផ្លូវលេខ១១៥ ភូមិព្រែកសំរោង១ សង្កាត់តាខ្មៅ ក្រុងតាខ្មៅ ខេត្តកណ្ដាល ។
ប្រភពពីកន្លែងកើតហេតុបានឱ្យដឹងថា ជនសង្ស័យ២នាក់ខាងលើពុំទាន់ស្គាល់អត្តសញ្ញាណនោះទេ បានជិះម៉ូតូម៉ាកហុងដាឌ្រីមមួយគ្រឿងឌុបគ្នា ហើយធ្វេីសកម្មភាពធាក់ប្លន់យកម៉ូតូម៉ាកBeat ពីនារី២នាក់ តែភ្លាត់ស្នៀតបណ្ដាលដួលរងរបួសទាំងអស់គ្នា ហើយភ្លាមៗនោះសមត្ថកិច្ចចាប់បានជនសង្ស័យម្នាក់ រីឯម្នាក់ទៀតបានរត់គេចខ្លួនចូលក្នុងដីឡូត៍មួយកន្លែងនៅក្បែរនោះ តែត្រូវបានប្រជាពលរដ្ឋសហការជាមួយកម្លាំងអធិការដ្ឋាននគរបាលក្រុងតាខ្មៅ និងកម្លាំងប៉ុស្តិ៍នគរបាលតាខ្មៅឡោមព័ទ្ធចាប់ឃាត់ខ្លួនបានតែម្ដង។
បច្ចុប្បន្នជនសង្ស័យទាំង២នាក់ត្រូវបានសមត្ថកិច្ចក្រុងតាខ្មៅកំពុងធ្វើការសាកសួរ និងកសាងសំណុំរឿងចាត់ការតាមច្បាប់៕
